રાજસ્થાનમાં પણ "મેઘા" એ વેર્યો વિનાશ , ડેમ તૂટતાં ગામડા ડૂબ્યાં, દુર્ઘટનાઓ વચ્ચે અપાયુ ફરી એલર્ટ

રાજસ્થાનમાં પણ “મેઘા” એ વેર્યો વિનાશ , ડેમ તૂટતાં ગામડા ડૂબ્યાં, દુર્ઘટનાઓ વચ્ચે અપાયુ ફરી એલર્ટ

રાજસ્થાન માં વરસાદી એલર્ટ : રાજસ્થાનમાં ચોમાસુ ફરી એક વખત સક્રિય થયું છે. બંગાળની ખાડીમાં લો-પ્રેશર સિસ્ટમને કારણે આગામી ચાર દિવસ સુધી વરસાદની આગાહી આપવામાં આવી છે. 3 સપ્ટેમ્બરના રોજ ઝાલાવાડ, પ્રતાપગઢ અને બાંસવાડા માટે ઓરેન્જ એલર્ટ અને જ્યારે ચિત્તોડગઢ, બુંદી, કોટા, બારા, સવાઈ માધોપુર, કરૌલી, ધોલપુર, ભરતપુર, દૌસા અને અલવરમાં યલો એલર્ટ રહેશે.

રાજસ્થાનમાં ભારે વરસાદ અને પૂરની સ્થિતિ

રાજસ્થાનમાં સતત વરસાદને કારણે જાલોર, સિરોહી, દૌસા, જોધપુર અને પ્રતાપગઢ જેવા અનેક જિલ્લાઓમાં પરિસ્થિતિ ગંભીર બની છે. દૌસાના લાલસોટમાં આવેલો નાલાવાસ ડેમ તૂટતાં જયપુરના કોટખાવડા અને ચાકસુ તાલુકાના પાંચથી વધુ ગામોમાં પૂર આવ્યું છે, જ્યાં સેંકડો લોકો ફસાઈ ગયા છે.

ભારે વરસાદને કારણે અનેક અકસ્માતો થયા

ભારે વરસાદ થી પ્રતાપગઢમાં એક શિક્ષક પુલ પરથી માહી નદીમાં પડી ગયા, સવાઈ માધોપુરમાં એક યુવક બંધ પર સ્ટંટ કરતા તણાઈ ગયો, જોધપુરમાં એક મકાન ધરાશાયી થયું, પાલીમાં એક ટ્રક ફસાઈ ગઈ અને જાલોરમાં ત્રણ બાઇક સવાર પાણીમાં તણાઈ ગયા, જેમાંથી એકની શોધ ચાલુ છે.

‘લાલસોટ’ના “નાલાવાસ” ડેમ તૂટ્યા બાદ પરિસ્થિતિ અત્યંત ગંભીર બની છે. ડેમનું પાણી ગામડાં, ખેતરો અને ઘરોમાં ઘૂસી જતાં પોલીસ અને સ્થાનિક પ્રશાસને એલર્ટ જાહેર કરીને બચાવ કામગીરી શરૂ કરી છે.

છેલ્લા 24 કલાકમાં વરસાદનો રેકોર્ડ

છેલ્લા 24 કલાકમાં, રાજસ્થાનના પૂર્વ અને દક્ષિણ ભાગોમાં ભારે વરસાદ નોંધાયો છે. સૌથી વધુ વરસાદ દૌસા જિલ્લાના નાંગલ રાજાવાતાનમાં 53 મીમી જેટલો અને રામગઢ પચવારામાં 50 મી.મી જેટલો નોંધાયો છે. આ ઉપરાંત, ભરતપુર, નાગૌર, જયપુર, કરૌલી, અલવર, બારાં અને સવાઈ માધોપુરના અનેક વિસ્તારોમાં પણ ભારે વરસાદ પડ્યો છે.

હવામાન વિભાગની આગાહી

હવામાન વિભાગના જણાવ્યા અનુસાર, બંગાળની ખાડીમાં બનેલી લો-પ્રેશર સિસ્ટમ અને અન્ય ટ્રફ લાઈનને કારણે રાજસ્થાનમાં 7 સપ્ટેમ્બર સુધી ભારે વરસાદ ચાલુ જ રહેશે. આ વરસાદને કારણે નદીઓ, નાળાઓ અને ડેમમાં પાણીનું સ્તર વધી શકે છે, જેનાથી કેટલાક જિલ્લાઓમાં પૂર જેવી પરિસ્થિતિ સર્જાઈ શકે છે.

પ્રશાસન દ્વારા તકેદારી

ભારે વરસાદ અને અકસ્માતોને ધ્યાનમાં રાખીને પ્રશાસને લોકોને સાવચેત રહેવાની અપીલ કરી છે. નદીઓ અને બંધોની નજીક ન જવાની સલાહ આપવામાં આવી છે. ઘણા જિલ્લાઓમાં શાળાઓમાં રજા જાહેર કરવામાં આવી છે અને રાહત-બચાવ ટુકડીઓ એલર્ટ પર છે. ગ્રામીણ વિસ્તારોમાં પાણી ભરાવાને કારણે વીજળી અને વાહનવ્યવહાર પણ પ્રભાવિત થયો છે.